শুকুরবার মোর ছুটির দিন,

টপকো কোহিচে উঠিবা।

বিছিনা গেনা টানে ধোইচে,

মোক না দেছে উঠিবা।

আতিডা পোহাইতে না পোহাইতে,

মা ধোইচে চেঁচাচেচি কোরিবা,

নিন্দে মুন্দে শুনা পাছু,

দুয়ারত ধোইচে মা ডাংগাবা।

চোখুলা মুই ঘসরাইতে ঘসরাইতে,

গেনু এগিনা খানত।

মা কহেচে নাটক কোইন্না,

টপকো যা কান্দরত।

হাত মুখলা ধুইয়া হানে,

গেনু কান্দর বাড়ি।

বাবা মোক দেখে হানে,

মারেছে খালি ঝাড়ি।

বাড়ি আসে কোহিনু মুই,

ভাত দেগে মা বাড়ে,

আন্ধঘর তকা বাইর হোইল মা,

হাতত নাঠি ধোরে।

মনে মনে চিন্তা করছু,

ভাত নাই আজি মোর কপালত।

ভোকে পেট্টা মোচড় দেছে,

খাবা নাগিবে আজি হোটেলোত।

ভাত খাবা মুই হোটেল যাছু,

ওইনে দিলো মা ডাক।

কুনঢে যাছিত? তোর বাপের তানে,

নিয়া যা টপকো ভাত।

শান্তি নাই জীবনডাত মোর,

কি দে এলা কোরিম।

কুনবেলা মন্ডা কহেচে,

না বিষ খায় হানে মোরিম।

পঞ্চগড়ের ভাষায় কবিতা : ছুটির দিন